الثلاثاء 21/أبريل/2026 – 10:47 ص
حررت إحدى السيدات محضرًا بقسم شرطة أول أكتوبر تتهم خلاله أحد الأشخاص بمعاونة أسرته بالتعدي عليها بالسب، وإتلاف جزء من سيارتها على إثر خلاف نشب بينهم على أولوية المرور بمنطقة الحصري التابعة لأكتوبر.
سيدة تحرر محضرًا ضد أسرة بأكتوبر
وقالت السيدة خلال منشور عبر مواقع التواصل الاجتماعي فيس بوك: النهاردة الإثنين 20/4/2026 حوالي الساعة 8:04 مساءً، وأنا سايقة عربيتي ومعايا والدتي، وكنا واقفين قدام راية بعد الحصري بسبب زحمة شديدة جدًا، وسرعتي كانت بطيئة جدًا حوالي 4 كم/س.
فجأة عربية شيفروليه لانوس لونها رصاصي، راكب فيها راجل ومعاه أسرته “ست وبنتين”، كسرت عليّ من اليمين وخبطت في مراية عربيتي وكسرتها، رغم إني كنت ماشية بهدوء جدًا ومفيش أي احتكاك مني، اتفاجئت إن واحدة من البنات اللي ورا بدأت تشتم بألفاظ بشعة جدًا ومن غير أي سبب، ولما حاولت أتكلم وأسألها بتتكلمي كده ليه، أبوها دخل يزعقلي بأسلوب صعب جدًا وغير محترم، ونزلت عشان أصور نمر العربية كإجراء طبيعي واحتياطي، فالراجل فهم الموضوع غلط وابتدوا يتعاملوا معايا بعدوانية شديدة، والبنت حاولت تنزل تتخانق معايا بس معرفتش عشان العربية كانت قافلة عليّ.
وقالت: أنا راجعة أركب عربيتي، الموضوع خرج عن السيطرة، وفضلوا يوجهوا شتايم وألفاظ خادشة جدًا، وفيه تحرش لفظي واضح ليا ولأهلي، والراجل كمان اتحرك بالعربية قدام شوية وهو لسه بيضايقني، ونزل صورني وصور نمر عربيتي، وابتدوا يهددوني بشكل صريح.
وأضافت: لما حاولت أوثق اللي بيحصل بالموبايل، البنت هاجمتني بشكل مباشر، وحاولت تشد الموبايل مني أكتر من مرة، وضربتني في راسي، وده يعتبر تعدي جسدي صريح، ولولا تدخل راجل محترم كان موجود في المكان ومنعها، كانت الأمور ممكن تتطور بشكل أخطر.
وأكملت: اتوجهت فورًا لقسم أول أكتوبر وحررت محضر بالواقعة، وكان في تعاون واضح من رجال الشرطة، وبانتظار اتخاذ الإجراءات القانونية.
وذكرت: بطالب وزارة الداخلية بسرعة التحرك واتخاذ اللازم، لأن اللي حصل ده مينفعش يتسكت عليه، ولازم يكون فيه ردع لأي حد بيفكر يتعدى على الناس بالشكل ده.