الخميس 28/مايو/2026 – 09:52 ص
يواصل القاهرة 24 نشر التحقيقات في قضية إقدام عامل على قتل جاره وإحراق جثته بسبب محاولة الأخير ابتزاز المجني عليه بفيديو مخل، يجمعه بإحدى السيدات بمنطقة العياط بمحافظة الجيزة.
المتهم بقتل جاره في العياط لابتزازه بفيديو مخل: أنا مدخلتش مدارس وعلاقتي بمراتي زي الفل
واستمع رجال التحقيق لأقوال المتهم بقتل شاب العياط وبسؤاله عن ظروف وطبيعة نشأته، وجاءت كالآتي:
ج: أنا اتولدت في بيت مكون من أنا وأخويا و4 بنات وأبويا كان شغال موظف في الري وكمان كان فلاح وأمي كانت فلاحة وكانت حياتنا كويسة وكنا في أسرة متوسطة وأبويا لسه عايش لحد دلوقتي وأمي اتوفت من 6 سنين وأخويا الكبير شغال موجه في التربية والتعليم، وأخواتي البنات متجوزين وأنا اتعلمت سنة واحدة كنت بهرب من المدرسة ومكملتش تعليمي ومكنتش بحب أروح المدرسة وكنت بعد لما بهرب بروح اشتغل في الغيط مع أمي وأبويا وأنا بدأت شغل في الفرن من وأنا عندي 11 سنة اشتغلت في الفرن وكنت باخد أجر بسيط لحد ما اتعلمت صنعة العجين وبعدين سبتهم واشتغلت في محل فراخ وقعدت خمس سنين وبعدين دخلت الجيش وقعدت فيه 3 سنين واتجوزت قبل ما ادخل الجيش وأنا عندي 20 سنة وبعد لما خلصت الجيش اشتغلت في الفرن واتعينت عامل في مسجد عبد الصمد في قرية جرزا وأنا بروح المسجد بصلي جميع الأوقات علشان بنضف المسجد بعد لما الناس تخلص صلاة وباذن للصلاة في بعض الأوقات.
س: ما هو طبيعة عملك تحديدا؟
ج: أنا شغال عامل في مسجد عبد الصمد تابع لوزارة الأوقاف وكمان شغال عمل إضافي في فرن عيش اسمه فرن الصبر وعندي أرض مأجرها وبزرعها أنا وأخويا وأنا معايا أرض ملك نحو 13 قيراطا وبزرعهم أنا وأخويا بردو.
س: كم مدة عملك في وزارة الأوقاف وكذا في المخبز سالف الذكر؟
ج: أنا شغال عامل في الأوقاف من حوالي 26 سنة وفي فرن العيش من حوالي 30 سنة.
س: ما حالتك الاجتماعية تحديدا؟
ج: أنا متجوز في 1993.
س: ما طبيعة العلاقة فيما بينك وبين زوجتك؟
ج: علاقتي بيها زي الفل.
س: هل رزقت بأبناء من ذلك الزواج؟
ج: أيوه معايا ج وشغال غفير نظامیي وعنده دلوقتي 28 سنة وجوزته وس عنده 25 سنة وشغال في محل فراخ وب عندها 27 سنة ومتجوزة ومش بتشتغل وا عنده 21 سنة وشغال في محل فراخ ومتجوز وم عنده 16 سنة ولسه متجوزش ومش بيشتغل.
س: ما مصدر دخل الأسره تحديدا؟
ج: هي حالتي المادية كويسة علشان أنا شغال كذا شغلانة وبقبض من شغلي في الأوقاف 6 آلاف جنيه وبقبض من الفرن نحو 40000 جنيه والأرض زي ما تجيب كل سنة.
س: ما مؤهلك الدراسي؟
ج: معيش أي مؤهل وأنا روحت سنة واحدة المدرسة وكنت بهرب منها وبعدين بطلت أروح.
وقضت الدائرة الخامسة بمحكمة جنايات القاهرة بـ 15 مايو، برئاسة المستشار أسامة عبد الظاهر أحمد رئيس المحكمة، وعضوية المستشارين جودت ميخائيل قديس وجمال أحمد حتة، ومحمد مصطفى جاد الكريم، بالإعدام شنقا على المتهم بعد أخذ رأي مفتي الجمهورية في إعدامه.