الثلاثاء 26/مايو/2026 – 12:16 م
يواصل القاهرة 24، نشر التحقيقات في قضية خطف رضيعة الحسين، التي وقعت منتصف الشهر الماضي، بمنطقة الجمالية بالقاهرة، وحوت الأوراق شهادة والد الرضيعة، وكيف خدعته المتهمة، وسبب مغادرته المستشفى واكتشافه خطف ابنته.
تحقيقات قضية رضيعة الحسين
واستمع رجال التحقيق إلى أقوال جدة رضيعة الحسين، وجاءت أقوالها كالتالي:
س: ما معلوماتك حول الواقعة محل التحقيق؟
ج: اللي حصل إن بنتي كانت حامل وراحت تولد في مستشفى الحسين الجامعي ودخلت عملت عملية قيصرية وخلفت بنت وبعد كده دخلت غرفة الإفاقة علشان تفوق من البنج وبعد لما فاقت من البنج دخلونا غرفة ثانية والمستشفى جابت لنا الطفلة المولودة وبيتنا اليوم في غرفة في المستشفى.
وأضافت: وبعدين تاني يوم نقلونا لغرفة ثانية، وإحنا بننقل أنا كنت مُنهكة بحاجات كتير شايلها، وكان معايا البنت كمان، فلقيت واحدة ست منقبة عرضت عليّ المساعدة، فسندت بنتي سارة وروحنا على غرفة رقم 8، وبعدين لما روحنا هناك هي فضلت لازقة فينا، وبعدين رجب جوز بنتي كان لسه جاي وقاعد معنا، وبعدين أنا سبت بنتي ورجب والست المنقبة وروحت أعمل كوباية شاي، والطفلة ساعتها كانت مع بنتي، وروحت ورجعت ملقيتش رجب ولا البنت المولودة ولا الست المنقبة.
وتابعت: فسألت بنتي عن الطفلة فقالت لي إن الست المنقبة أخدتها وحطتها على السرير اللي جانبها، فبصيت وملقيتش أي حاجة، وجيت أكلم رجب جوز بنتي أسأله ملقيتش الموبايل بتاعي، فاستلفت موبايل من حد في المستشفى وكلمته وقال لي إنه كمان مش معاه الطفلة، فبلغنا الأمن، والشرطة جت وعرفت أنهم شافوا الست المنقبة وهي خارجة من المستشفى بالطفلة.
س: متى وأين حدث ذلك؟
ج: الطفلة اتولدت يوم 2026/4/13 واتخطفت يوم 2026/4/14 حوالي الساعة 12 ظهرًا بمستشفى الحسين الجامعي.
س: وما سبب ومناسبة تواجدك بالمكان والزمان سالفي الذكر؟
ج: أنا كنت قاعدة مع بنتي علشان بتولد.
س: ومن كان برفقتك آنذاك؟
ج: أنا وبنتي ورجب جوز بنتي.
س: وما هي ظروف تقابلك مع المتهمة المنتقبة؟
س: وما الذي حدث عقب أن قمتم بالدلوف إلى الغرفة الثانية؟
ج: بنتي نامت على السرير، والمولودة كانت في حضنها، لكن الست المنتقبة فضلت لازقة فينا.
س: وهل من ثمة حديث دار فيما بينكم؟
ج: أيوه.
س: وما هو مضمون ذلك الحديث؟
ج: هي قالت لي أروح أعمل شاي.
س: وهل قمت بترك نجلتك آنذاك؟
ج: أيوه.
س: ومن كان موجودًا بالغرفة آنذاك؟
ج: بنتي، وجوزها رجب كان وصل، والست المنتقبة.